Epela baino pixka bat hotzagoa den likidoari esaten diogu Zumaian eta inguruan “hotzila” (ahoz “hotzilla”). Antzekoak dira “hotzepel” eta "zerrepel" ere, eta batzuek eguraldiarekin ere erabiltzen dituzte hitz hauek.
Gotzon Garate idazleak gure eskualdean bildu zuen “otzilla ekarri” esaera, Aittolazar baserrian, hain zuzen. Iñaki Segurola idazle azpeitiarrak ere behin baino gehiagotan erabili zuen bere lanetan, esaterako Arrazoia ez dago edukitzerik liburuan:
- Ondo osatutako sukaldean bada gozotik, gezatik, gazitik, minetik, erretik, egositik, gordinetik eta denetik; bada gustua, usaina, lurruna, beroa, epela, hotza eta hotzila.
Zumaiako adibideei dagokienez, Kantera baserriko Trini Antia Gorritik kontatutakoa da babarrunak prestatzeko “ur hotzilletara” bota behar direla.