Azaroaren 13an, ostirala, Hezkuntzaren digitalizazioa aztergai izeneko solasaldia izango da Alondegiko Oxford aretoan. Telmo Lazkano irakasle zumaiarrak eskainiko du hitzaldia, argitaratu berri duen Reset educativo eleberria ardatz hartuta.

Irakurmenean, matematikan zein zientzian, beherako bidean jarraitzen du Hego Euskal Herriko bigarren hezkuntzako ikasleen mailak. Hori ondorioztatu daiteke, behinik behin, PISA txostenaren azken edizioan jasotako emaitzei erreparatuta. PISAk aurkeztutako argazkiak Urola Kostako ikasgeletan ikusten dutenaren antz faltarik ez duela adierazi dute erreportaje honetarako hitz egin duten profesionalek, baina argazki osoak beste kolore eta osagai batzuk ere baditu, eta horiek ere kontuan hartzearen beharra azpimarratu dute.