Datorren azaroaren 13an, ostirala, Hezkuntzaren digitalizazioa aztergai solasaldia izango da Alondegiko Oxford aretoan, 18:00etatik 19:00etara. Hitzorduan Telmo Lazkano Zumaiako irakasleak gidatuko du, eta argitaratu berri duen Reset educativo eleberria oinarri gisa hartuta, ikasgeletako digitalizazioaren inguruko gakoak eta hausnarketak herritarrekin partekatuko ditu.
Alberdania argitaletxearekin emandako liburuan, Lazkanok multinazional teknologikoek hezkuntza-sisteman sartzeko dituzten ezkutuko interesak eta pantailen neurrigabeko erabilerak sortzen dituen kalte pedagogikoak landu ditu. Egilearen esanetan, liburua ez da teknologiaren aurkako manifestu bat, baizik eta irakurlea pentsatzera bultzatzeko tresna bat.
Ostiraleko aurkezpenean, hainbat galdera eztabaidaren erdigunera ekarriko ditu Lazkanok: hezkuntzaren digitalizazioa askea al da? Osasuntsua al da? Azken PISA txostenaren atzean zer dago?