Ander Hormazurik gidatzen duen ZumaienArte guneko pintura tailerretan izena emateko aukera izango dute datorren astelehenetik irailaren 25era bitartean. Matrikula Zumaiena ikastolaren sarreran egin daiteke, astelehenetik ostiralera, 17:00etatik 17:30era.
8 eta 16 urte bitarteko herritarrei zuzendutako oinarrizko pintura saioak nahiz helduentzako tailerrak eskainiko ditu Hormazurik. 8 eta 12 urte arteko haurrei zuzendutako saioak astearteetan eta ostegunetan izango dira, 17:00etatik 18:00etara; 12 eta 16 urte bitarteko gaztetxoenak astelehenetan eta asteazkenetan ordutegi berdinean; eta helduei zuzendutako saioak, berriz, bi txandatan banatuko dituzte: astelehenetan eta asteazkenetan, 18:30etik 20:00etara, eta astearteetan eta ostegunetan, 15:00etatik 16:30era.
Ander Hormazuri artista zumaiarrak eta Zumaiena ikastolak antolatzen dute ZumaienArte gunea, hezkuntza, artea eta natura uztartzeko helburuarekin.
Informazio gehiago nahi duten herritarrek 623706593 deitu dezakete.