Sudurrari darion muskira edo muki urari esaten diogu Zumaian eta inguruan “dindirrina” (ahoz “dindirriña”). Hiztegietan “dindirri” agertzen da (gaztelaniaz “moquita” edo “moquillo”), eta Bizkai aldean asko erabiltzen da; mukiari bakarrik ez, zintzilik geratzen diren arropa zati eta antzekoei ere esaten diete (gaztelaniaz “colgajo” edo “pingajo”). Larramendiren hiztegian (1745) “jeladindirria” deitzen zaio teiletatik zintzilik egoten den izotz zatiari.
Alex Olidenek kontatu digu amak asko erabiltzen duela hitz hau, Kantera baserriko Trini Antiak. Brigida Ibarbia oikiarrak ere ondo ezagutzen du, musutik iturria dagoenean sortzen dela kontatu digu.