Eraldaketa metodologikoa partekatzeko, bailarako mintegietan saioak eskaini ditugu eta Hezkuntza Sailaren proiektua den Partekatuz Ikasi-n, tutore lanak burutu ditugu, beste ikastetxe batzuen aholkularitza eginaz. Oraingoan, martxoaren 30ean, EAEko eskola publikotako 80 hezitzaileren bisita jaso dugu, Mugimendu Autonomoa proiektua gauzatzeko egin dugun ibilbidea, antolaketa, egunerokoa eta ekosistemak ezagutzeko.
2016-17 ikasturtean hasitako barne hausnarketa, gogoeta eta formazioak bere bidea egin du. Gaur egun, haurraren garapen integrala bultzatzen duten ekosistema anitz eta aberatsak ditugula esan dezakegu eta hezitzaileen eskuhartzeak eta antolaketak ere, bat egin du MUGIMENDU AUTONOMOAREN dinamikara.
Prozesu honetan ikasleen motibazioa, familia eta eskolaren arteko elkarlana eta hezitzaileen sendotze pedagogikoa areagotu dira.
Ikasturte hauetan emandako urratsak sakontzen jarraitzea eta behar berrietara egokitzea dira aurrera begirako erronkak. Atzo izandako saioan jasotakoak, gure proiektuan sendotzen jarraitzeko ilusioa ematen digu.