Narrondo auzoko bidegorriaren inaugurazio ekitaldian Mattin Etxaniz Iruretagoienak bertso batzuk kantatu dizkio auzoari. Mattinek Santelmoetako bertso idatzien lehiaketa irabazi zuen gaur Larraitz Ugarte diputatuaren eta Iñaki Agirrezabalaga alkatearen aurrean kantatu dituen bertso hauekin:
Narrondo
Doinua: Mutil koskor bat
Bi udaletxe dituen auzo
asko ez dira egongo
hargatik pentsa dezake inork
bizi gintezkela ondo.
Batek bestean aitzaki eginda
biek gehienetan tongo
ez Zumaiako, ez Zestuako
nola ez geran inongo.
Bi nagusiko goseak dagon
txakurra dugu Narrondo.
Auzo txiki bat izanagatik
ez da hain auzo eskasa
surtidoretan petrolioa,
tren zubi azpian gasa.
Hartu ohi zaio zuloan dagon
auzo itoaren traza
ta eskaerak eta denbora
alperrik ez dira pasa
bide gorriak emango digu
behar genuen arnasa.