Hilabete osora luzatuko dute Emakumearen Eguneko egitaraua

Juan Luis Romatet 2025ko mar. 3a, 11:55

Herriko eragileak, Martxoaren 8aren inguruan diseinatutako egitarauaren aurkezpenean. (Zumaiako Udala)

Manifestazioa egingo dute datorren larunbatean, hilaren 8an. Horrekin batera, emanaldiak edota hitzaldiak ere antolatu dituzte. Martxoaren 8aren inguruko mozioa ere aztertu zuten pasa den ostegunean egindako plenoan.

Emakume Langilearen Nazioarteko Eguna da martxoaren 8a, eta haren inguruko egitaraua prestatzen aritu dira herriko hainbat eragile: Emakumeon* Etxea, Zumaiako Mugimendu Feminista, Berdintasun Foroa, Malen Etxea elkartea, Hitzez emakume baserritarren elkartea eta Zumaiako Udala, esaterako. Haiekin batera bidelagun izan dituzte herriko ikastetxeak ere. Denen artean, hilabete osora luzatuko den egitaraua prestatu dute. 

Hasteko, etzi, asteazkenez, Ausencias de rojo erakusketa zabalduko dute Emakumeon Etxean, 18:00etan. Malen Etxeak eta Haurralde Fundazioak elkarlanean antolatutako mostra da honakoa, eta indarkeria matxistaren biktimak omentzea du helburu. Martxoaren 18ra arte bisitatu ahal izango da. 

Larunbatean, Zumaiako Mugimendu feministak deituta, manifestazioa egingo dute Saregile plazatik abiatuta. 13:00etan abiatuko da Faxismoaren kontra ausardia eta aliantza feministak! lelopean egingo duten martxa. Aurretik, goizez, 11:00etan hasita, zuzeneko irratsaioa egingo dute Saregile plazan bertan. 

Basadi auzategian abiatutako prozesuarekin jarraituz, beste saio bat egingo dute martxoaren 11n, asteartez, 17:30ean hasita, Basadi auzategian bertan. Hilaren 13an, berriz, ostegunez, Virginia Imazen Molestias clownicas antzezlana izango da Emakumeon Etxean, 18:30ean hasita. Hitzez elkarteak antolatutako emanaldia gaztelaniaz izango da. Haurdunaldi subrogatuei buruzko analisi feministak ere izango dituzte hizpide martxoaren 18an, asteartea, June Fernández kazetariaren eskutik. Saioa 18:30ean izango da, Emakumeon Etxean.

Hilabete amaieran beste bi hitzordu izango dira. Martxoaren 26an, formazio saioak egingo dituzte Zumaiako ikastetxeetan, Daiteke aholkularitzaren eskutik. Plazera ihes gelara bisitak ere egingo dituzte. Egun bat geroago, berriz, ostegunean, martxoaren 27an, RR_6_erre (AH) ala emanaldia eskaniko du Maialen Lujanbiok, 18:30ean, Emakumeon Etxean.

Mozioa, udalbatzarrean

Martxoaren 8aren harira Eudelek, Euskadiko Udalen Elkarteak, plazaratutako adierazpenarekin bat egin zuen Zumaiako Udaleko udalbatzarrak, pasa den ostegunean, hilaren 27an, egindako ohiko osoko bilkuran. Dokumentu hark genero berdintasunaren alde azken hamarkadetan egindako lana baloratzen du, baita udalen partetik konpromiso batzuk hartzea eskatu ere. 

Onartzen du azken hiru hamarkadetan, 1995kean Beijingen (Txina) egin zen emakumeari buruzko IV. mundu konferentzian adostutako akordioak planteatu zirenetik, aurrerapauso garrantzitsuak egin direla genero berdintasunaren bidean. Hala ere, bilakaera "desorekatua" izan dela gaineratu du, "oraindik munduko herrialde bakar bat berak ere" ez duelako lortu emakumeen eta gizonen arteko genero berdintasuna. 

Akordioaren 30. urteurrena betetzen dela eta, konpromisoak eta borondateak berritzeko unea dela dio mozioak, eta, zentzu horretan, Zumaiako Udalak ere zenbait konpromiso bere gain hartu ditu. Honakoak dira udalak hartutako zazpi konpromisoak:

  • Sustapen egiturak baliabide eta langile nahikoz hornitzea, berdintasunerako eta indarkeria matxistaren aurkako borrokari buruzko politikak garatzeko.
  • Berdintasun Foroaren bitartez, herriko emakume, emakume elkarte eta mugimendu feministaren parte hartzea sustatzea berdintasun politika publikoetan, emakumeak solaskidean izan daitezen eta eragin dezaten.
  • Tokiko gobernuan emakumeek eta gizonek berdintasunez parte hartzeko eta eragiteko errazten dituzten baldintzak sortzeko akordioak ahalbidetzea.
  • Tokiko arreta eta koordinazio protokoloak landu eta eguneratzea herriko eragileekin (mugimendu feminista barne), emakumeen aurkako indarkeria matxistaren biktimak eta bizirauleak onbideratzeko.
  • Herritarren artean, indarkera matxistari aurre egiteko programak garatzea, gizonak eta mutikoak bereziki mugiaraziz.
  • Zainketen ekonomia eraldatzeko tokiko prozesuak agian jartzea, ikuspegi feministatik.
  • Berdintasunaren eta indarkera matxistaren aurkako borrokari buruzko tokiko ekintza planetan jasotako agenda feministen gaineko kontuak ematea, aldian-aldian.

Zumaia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide