Laboral Kutxa taldean korrituko du Aitor Agirrek eta errepidean Essor Basqueko lasterketetan ekingo dio 2022ko denboraldiari; harako prestaketa bezala pistako lasterketaren bat egingo du. Open mailako lasterketa honetan Euskaltel Euskadiko Xabier Mikel Azparren aurkari izango du, besteak beste; baita Dorian Foulon ziklismo egokituko txapeldun olinpikoa ere.
Kadete mailako Viveros San Anton-Exclusivas Marduko ziklistak ere bertan izango dira. Hiru jardunaldiren ostean, Iker Izagirre 17. da sailkapenean, Beñat Sainz 21., eta Lizar Tolosa 25. Aurreko larunbatean Iker eta Beñat A txandan aritu ziren, onenekin, alegia, eta erritmo aldaketa nabaritu zuten; hala ere, egunetik egunera hobeto dabiltzala ikusi zen. Scratchean Beñat 19.a izan zen eta Iker 20.a; Puntuaketan, Ikerrek 18. bukatu zuen eta Beñatek 20; eta Tempon Beñat 14. sailkatu zen eta iker 21. Lizar Tolosak B txandan lehiatu behar izan zuen, eta Scratchean eta Tempoan 9. sailkatu zen; Puntuaketan 11.a izan zen. Hilaren 8an ere pistako ziklismoak bere hitzordua izango du Antonio Elortza belodromoan.
Ziklo krosean, denboraldiaren erdira heldu dira Viveros San Anton-Exclusivas Marduko ziklistak. Garai (Bizkaia) izan zen larunbatean bilgune tokia eta kadete mailan Anuk Gogenola 21. helmugaratu zen; junior mailan, berriz, Eneko Aranguren 11.a izan zen, Mattin Salegi 20. eta Andde Etxaniz 23. Heiko Mateosek, osasun arazoekin, ez zuen bukatzerik izan. Eguraldiaren ondoren lokatz faltarik ez zen barrutian: baldintza gogorrak izan zituzten txirrindulariek.
Larunbat honetan Ametzaga-Zuian dute ziklo kros lasterketa Zumaiako Txirrindulari Elkarteko ziklistek; asteazkenean, berriz, Elorrion.