Ez dakigu zehazki noizko argazkia den; hala ere, 1960 bueltakoa izan daiteke, Oargui taldeak horrelakoak antolatzen zituen eta. Argazkiak ez du oso kalitate ona, baina erdialdeko aurpegi batzuek ezagutzeko moduak ematen dute. Informaziorik baduzu, idatzi xabier@azkue.eus helbidera, mesedez.
Arritokieta Manterolak Santa Agedako abestien orri bat ere gorde zuen, eta bertso haietako batzuk ekarriko ditugu hona:
Zorion etxe hontako denoi / oles egitera gatoz
aterik ate ohitura zaharra / aurten berritzeko asmoz
ez gaude oso aberats diruz / ezta ere oinetakoz
baina eztarriz sano gabiltza / ta kanta nahi dugu gogoz
Alkate jauna legean gatoz / baimen eskean atera
kanta zaharrak galdu ez ditezen / lehengo ohitura piztera
guraso zaharren legean pozik / goaz denok kantatzera
Santa Agedak ekarri gaitu / berorren etxe aurrera
Mendi tontorrak elurrez zuri / atarialdean laiotza
etxe hontako nagusi jaunak / urrezkoa du bihotza
Santa Agedak kendu digu gaur / eskean hasteko lotsa
dirurik ez bada berdin zaigu / gizendutako bildotsa
Zelai erdian loreak argi / larros krabelin ta lili
etxe hontako etxekoandreak / Ama Birjina dirudi
etxe hontako urdaiazpiko/ asko kakotik zintzili
ta lukainka gorriak ugari / poltsa betetzeko guri.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!