Arropen barruko aldeari edo alde txarrari esaten diogu Zumaian “alde(r)ontzia”. Hitz ezagunena “alderantzi” da eta “alde erantzi”-tik dator. Maria Antonia Goikoetxeak kontatu digu “alde ona” izaten dutela arropek, eta bestea “aldeontzia” izaten dela: aldeontzira jantzita dakan jertse hoi! Brigida Ibarbia oikiarrak antzeko adibide bat eman digu: alderontziz gañea sartu galtzak labadoran.
Euskararen Herri Hizkeren Atlasean esanahi bereko beste hitz batzuk ere jaso zituzten: i(n)frentzu, iruntzi(era), idulesta, binp(h)er, girbin, iraoltz(e), alde(rdi)txar, kontra(ko alde), barruko (alde), itzuli(ko alde), aldrebes(ko alde), etab.