Harrokeria erakusteari “pantasia” esaten zaio Zumaian eta beste herri batzuetan. Orotariko Euskal Hiztegian antzeko beste aldaera batzuk ere jasota daude: fantasia, fantesia, pantesi... Gaztelaniaz “arrogancia” eta “aspaviento” (tartean keinuak badira) erabiltzen dira adiera horretarako.
Brigida Ibarbia oikiarrak esana da ez zaiola gustatzen Unai Lasok sakea atera aurretik zenbat “pantasi” ibiltzen duen; bateko jauzia, besteko pilotari heltzeko modua... Oiartzunen ere ezaguna da adiera hori, "harroxko" agertzen direnei deitzeko.
Bertsoetan ere topatu ditugu antzeko adibide batzuk:
· Uztegiko Argiña / bertsolari piña, / ba daukak fantasia / konbeni adiña. (Iztueta)
· Bainan batzuk ba dute / mila fantesia, / beren baitarik heldu / zaiela grazia. (Bordel).