Baratzeko produktuak eta gauzak garraiatzeko erabiltzen den saski txikiari esaten zaio Zumaian "kapolotarra". Ez da forma bakarra, hala ere, herrian bertan ere jasoak ditugulako "kapelotarra" (Trini Antiari), "kopolotarra" (Brigida Ibarbiari) eta "kapa-otarra" (Mª Jesus Oiartzabali). Itxura batean, kopa forma duelako deitzen zaio horrela. Zestoarren erretolika liburuan "kapolatar" jaso zuten, eta Zarautz hizketan lanean, berriz, honela definitzen dute "kopotar": otarre txikia, janariak-eta eramateko erabiltzen dena, lepotarra baino txikiagoa.
Mª Jesus Oiartzabalen amama, Anttoni Murua, Altzokoa zen eta Endañeta baserrira etorri zen Antonio Aizpuruarekin ezkondutakoan. 97 urterekin hil zen, eta ia azkenenera arte baratzean jardun zuen lanean. Pena bakarra omen zuen bukaeran: ezin zuela kopa-otarra bizkarrera igo!