Zumaiako arraun elkarteak beti landu du harrobia, hobeto edo okerrago. Eta bandera asko etorri dira harrobiko arraunlariekin %100ean osatuta.. Gure harrobia zabala baita: Matxinbentatik Zumaiara, Itziartik pasata. Argazki honetako kirolari denak *zumaiarrak eta harrobikoak dira.
Lagun batek aipatu didanez, hamalau zumaiarrekin osatutako traineru batek, bandera bakarra irabazi omen du: Colindresen,1994ko abuztuan. Argazkiko arraunlariak hauek dira:
- Istriborrean: Iurgi, Iñigo, Felix, Oikiya, Xebas, Saskate
- Ababorrean: Etxaniz, Tomas, Kurrinoa, Gorka, Dani, Stephane, Tximin
- Patroi: Joseba Aristi
Argazki hau Javier Carballok ateratakoa da 1994ko uztaileko ilunabar batean. Trainerua egurrezkoa da; oraingo Amlibiaren 'platanito' itxuratik ez dauka. Killa guztiz zuzena da, txopan eta brankan okerdurarik gabea.
Teknologiari dagokionez, Aristik paladak neurtzeko erloju berezi bat dauka; wattak neurtzeko azaburuaren tamainari begiratzen zaio. Arraunlarien eskumuturrean Casio moduko elojuak ikus daitezke, eta ez dago GPS-rik. Inpernupe eta Sakoneta bitartean gaude, iparmendebalderantz arraunean.
Hamalau zumaiarren kontua bitxikeria moduan aipatu dizuet, beste mila aipatu ditzakedan bezala. Zumaian guztientzat baitago atea zabalik, haur gazte edo beterano, hemengo edo hangoa izan.
Datorren astean, traineruaren pisua aztertuko dugu, bitartean, tapapala eta gortu balantza!
(*) Zumaian bizi edo, eta jaioa.