Otsailak 11, asteazkena, 18:30. Oxford aretoa. "Euskal ohiturak: natura erdigunean", Jakoba Errekondo agronomo eta paisajistaren eskutik. Oso ezaguna da Jakoba, batez ere euskal hedabideetan egiten dituen kolaborazioengatik (adibidez, Argian eta Euskadi Irratian), landareen gaien inguruan, batik bat. Oraingoan natura euskal ohituren erdigunean jarriko digu.
Otsailak 25, asteazkena, 18:30. Oxford aretoa. "IAIAIAI: irrintzia eta komunitatearen garapen artistikoa euskaraz". Antzezlea eta musikaria izateaz gain, Nerea Iglesias Aiaraldeko Ekintzen Faktoriako kultur arduraduna da, eta Marixi Sesma musikariarekin hizketan, euskaratik egindako kultur ekimenetan barneratuko gaituzte biek.
Martxoak 11, asteazkena, 18:30. Oxford aretoa. "Esnatu ala hil: euskararen egoerari buruzko gogoeta". Garikoitz Goikoetxea euskara-teknikaria izango dugu hizlari, Iñaki Iurrebasorekin elkarlanean idatzi berri duen liburuko edukiez hizketan; datuetan oinarrituta, euskararen egoera azaldu ez ezik, etorkizunerako gakoak ere aletuko dizkigu. Euskaldunok lozorroan gaude, eta esnatu eta zerbait egin ezean, oso etorkizun iluna daukagu.
Martxoak 18, asteazkena, 19:00, Aita Mari zinema aretoa. "Laburbira, euskarazko film laburren zirkuitu ibiltaria. XXIII. edizioa". Zazpi film labur oso desberdin ikusteko aukera izango dugu:
- Geratzen den hori. Aitor Gametxo Zabala
- Fishy. June Asua Olabarria
- A-Maniki. Elixabet Nuñez
- Orain zer? Ainhoa Urgoitia
- Erreka zoko hortan. Ekaitz Bertiz
- Hortzikara. Ane Cuesta
- Olentzerori eskatu nion. Amaia San Sebastian Larzabal