Egun handia izango da gaurkoa! Izan ere, gaur, Korrikari hasiera emango zaio Zuberoako Atharratze herritik. Iparraldeko lagunek hainbat zailtasun bizi dituzte beren eguneroko jardunean, eta bide horretan elkartasun-zubiak eraikitzeko asmoz, Zuberoako Eperra eta Basabürü ikastoletako ikasle, irakasle eta familiei gure elkartasuna adierazi nahi izan diegu, keinu sinboliko baten bidez.
Pasatako Gabonetan, ekimen polita antolatu genuen urtero bezala Baso Magikoan, Euskal Herriko pertsonaia mitologikoekin. Ekimen horretan bildutako dirua aipatutako bi ikastolei ematea erabaki dugu. Zenbatekoa handia ez den arren, ikastolen arteko elkartasuna eta babesa erakutsi nahi izan diegu. Gora Zuberoako ikastolak!