Gaur, apirilak 2, Autismoaren Nazioarteko Eguna dela eta, Zumaiako dendak autismoa duten pertsonen errealitatea ikusarazteko eta gizartearen ulermena sustatzeko kolore urdinez jantzi dira. Zumaiena ikastolako guraso elkarteak sustatutako ekimen honetan, ikasleek, Gisasola egoitzako erabiltzaileek eta Gertu dendarien elkarteak indarrak batu dituzte herriko erakusleihoak tximeleta eta sentsibilizazio mezuz betetzeko.
Egitasmo hau Zumaiena Ikastolako ama talde baten eskutik sortu zen, ikastolako Hedatze proiektuaren barruan tailer inklusiboak antolatzeko asmoz. Bertan, Gisasola egoitzako kideek eta ikasleek lan egin dute, tximeleta urdinak eskuz egin eta dendariei banatuz. Belaunaldien arteko lankidetza honen bidez, Gertu elkarteko dendarien laguntzarekin, dekorazio hutsetik haratago doan zubia eraiki da, aniztasunean oinarritutako Zumaia inklusiboago baten aldeko apustua eginez.