Pala jaialdia jokatuko dute datorren larunbatean, azaroaren 9an, 17:30ean hasita, Aitzuri pilotalekuan. Innpalak, Zumaiako Udalak eta Zumaiako Kirol Elkarteak antolatutako jaialdia gazte mailako eta profesionalen arteko partida banaz osatuko da. Pala modalitatea Zumaiako herritarrengana hurreratzea izango du helburu zapatuko hitzorduak. Asmo horrekin, sarrerak doan izango dira.
Lehenbizi, Zumaiako Kirol Elkarteko pilotari gazteak jokoan ikusteko aukera izango da. Hala, Joel Martinek eta Urko Ostolazak osatutako bikoteak, Telmo Carballo eta Aritz Garikanoren aurka jokatuko du. Jarraian, profesionalen arteko lehia izango da: Roman Maldonado eta Oier Alkorta azpeitiarra, Esteban Gaubeka eta Ibai Perezen aurka arituko dira.