16 urtetik gorakoentzat pentsatutako ekimena denez, Batxilergoko ikasleak eta irakasleak bildu dira Euskaraldiarekin bat egiteko. Ekintza hau zerrenda luze bateko azkena izan da; izan ere, udazken guztian zehar hainbat aldiz izan da Euskaraldia protagonista Herri Eskolan. Batxilergoko ikasle guztiek formakuntza saio bereziak jaso zituzten hasieran; jarraian izen-emate epea ireki eta bereziki sustatu zen parte hartzea; gurasoentzat edota komunitateko beste kideentzat ere izena emateko txokoa prestatu da. Eta txapa janzteko ordua iritsi denean ere, Herri Eskolako pasabideak partaidez beteta ikusi ahal izan ditugu azken egunetan; batez ere, Ahobizien rola hartu dute.
Euskararen Eguna bertan da eta euskararekiko jarrera aktiboa hartzea ezinbestekoa iruditzen zaigu Zumaia bezalako arnasguneek indartsu jarrai dezaten.