Azken hilabeteotan maiz entzun dugu hedabideetan gazteen artean eskuin muturrera jotzeko hautu politikoa zabaltzen ari dela. Ez da gezurra, inkesta soziologikoei erreparatuz gero, batez ere gazte gizonezkoen artean iritzi arrazistak eta atzerakoiak indartzen ari direla ikus dezakegu eta. Euskal Herria ez dago joera horretatik salbu, ezta historikoki antifaxistak izan diren esparru politikoak ere, euskal abertzaletasuna barne. Azken uda honetan euskal aberritik etorkinak kanporatzeko dei egiten zuten hainbat pankarta agertu dira gure hirietako festetan.
Anekdotikoa iruditu ahal zaigu, baina eskuin muturraren presentzia hor dago, nahiz eta komunikabide handiek joera hori puztu dutela ere aipatu behar den. Eskuin muturrak egiten duen manifestazio orori ahotsa ematen bazaio, nahiz eta hori txikia edo anekdotikoa izan, arazoa dena baino handiago dela uste dezakegu eta afera hedatzen lagundu. Baina arazoa txikia izanagatik ez da gutxietsi behar, ezta faxismoaren kale presentziari aurre egiten dioten gazte horien ekina salatu ere. Joera hor dago, baina oraindik ere gazte antifaxistak askoz gehiago dira.