XX. mende erdiko zuri beltzezko Zumaia hartan gauza asko egongo ziren zapalduta edo debekatuta, baina ezingo zuen zumaiarren edo, behintzat, zumaiar batzuen festa gogoa zapuztu. Diktaduraren amesgaiztoko garai hartan ez zen erraza izango askatasun apurra izatea festa batzuek antolatzeko, baina parrandazaleek aurkituko zituzten zirrikituak alaitasunari tarte bat irekitzeko.
Zumaiako Fototekan gordetzen den argazki hau izan daiteke horren adibide. Fitxari jaramon eginez gero, 1954. urtean ateratako irudia da, eta mozorrotutako kuadrilla agertzen da. Aurpegiak beltzez margotuta, eta marinelen edo lastozko txapelak buruan dituztela, Afrikatik edo Karibetik etorritako bisitarien planta dute. Akaso ordu txikiak arte ez ziren egongo festan, baina eguna bai ederki pasatu zutela.
Zumaia Gukak herritarrak animatu nahi ditu etxean gordeta dituzten argazki zahar eta esanguratsu horiek hartu, eta atal honetan partekatzera. Argazkia emailez bidal daiteke–zumaia@ukt.eus– edo eskura eman daiteke – Foronda, azken solairua–.