Aurten ere bertso mordoxka bildu ditu Bertso Eskolak Bota bertso bat lehiaketako kaxa gorrietan, gaitzat Iritsi da hartuta. Beste urte batzuetan finalisten artean geratu eta gero, oraingoan sari nagusia irabazi du Xabier Dominguez Piru-k, hau da, afaria bi lagunentzat Talaipe jatetxean. Bertso aipagarrien egileak, berriz, Ander Urbieta Txuli eta Xan-Bi izan dira. Hemen daukazue aurtengo bertso onentsuenen bilduma:
Bota bertso bat bilduma
Irabazlea
Doinua: Aizak hi mutil mainontzi
Lege berriak ugari
estutasuna nabari
garai gogor bat iritsi da ta
geu gaitu janari
atzo milioka eskari
aurrezki kutxen opari
gaur ostatua eskatu diot
etxean amari.
PIRU
Aipagarriak
Doinua: Betroiarena
Iritsi da garaia
krisiaz ahazteko
semeekin margotu
ta jolasteko
amatxo asko maite
zaitut esateko
neska gerritik heldu
eta dantzatzeko
dutxan kantatzeko
elkar laguntzeko
parre egiteko
negarrak tarteko
Bizitza hori dela
konturatzeko (bis)
Ander Urbieta "TXULI"
Doinua: Motibo bat nigana
Egokia diagu
aurtengoan gaia
iritsi omen zaiguk
laneko garaia
eskatu zak papera
hemen zegok mahaia
hik bertsoa asmatu
ni idazten saia
ona egiten badek
biontzat afaia
Xan-Bi