Jexux Alkorta hil berriari bertso hauek idatzi dizkio Feli Uriak. Oikiako eskolan irakasle aritu zen Uria urte askoan eta Jexux Alkortak emandako laguntza goraipatu du, besteak beste.
Doinua:
Amodioa zoin den zoroa
Auzo laguna
1
Kanpaiak izan dira herrian
betidanik mezulari
eliz dorreko dei ezagunak
jar arazten gaitu adi
gaurkoan ere ezkila ozen
doinu tristean kantari
heriotz baten berri ematen
Oikiako herriari
2
Urtean zehar elkar harturik
lehen bezalaxe gaur egun
auzolanean ohitutakoak
borondate hutsa lagun
Jexux Alkorta hortan maixua
hortan egin zen ezagun
gaur, hil berritan, denen gainetik
bera goraipa dezagun
3
Gaztetandikan etenik gabe
jatortasunez nabarmen
dela Udalan, dela eskolan
ze gogo eta ze kemen
zalapartarik atera gabe
bazuen nahiko ahalmen
bere laguntza baliotsua
aitortu nahi dut gaur hemen
Feli Uria