Joan den astean onartu ziren 2014ko udal aurrekontuak. EAJ kontra agertu zen, besteak beste, "funtzionamendu gastuak oso altuak izaten jarraitzen dutelako". Jarraian irakur dezakezuen prentsa oharrean zabalago irakur dezakezue jeltzaleen balorazioa:Zumaia jasaten ari den zorra lau milioi eurotik gorakoa dela salatu du EAJk
Edurne Egaña zinegotziak dio udalak aurrekontuaren %83a funtzionamendu gastuetara zuzenduko dituela
Zumaiako EAJk aurrekontuen proiektuari ezetza eman dio funtzionamendu gastuak “oso altuak izaten jarraitzen dutelako”. Plenoaren ondoren, Edurne Egaña Ogasun batzordeko bozeramaile jeltzaleak egindako balorazioan salatu du: “Aurrekontuaren ia %83a funtzionamendu gastuetara zuzenduko da eta edukiari dagokionez ez dute sinesgarritasunik eta ez dute erantzuten zumaiarren beharrei”.
Horrela adierazi du “Bilduren gobernu taldeak berriro aukera galdu du gaur egungo gastuen estruktura berrikusi eta egokitzeko, eutsiezina eta zuhurtzi gabea delako eta legealdi honen hasieratik diogun bezala ezinbestekoa izango da berrikustea eta egokitzea”.
Egañak, gastuen estruktura optimizatzea ahalbideratuko duen akordioetara heltzeko prestasuna berriro adierazi du baina “arian-arian neurriak hartzen joan beharrean urtez urte desoreka areagotzen doa norabiderik gabeko ihesi moduan.”
“Bilduren gobernu taldeak aurrezteko neurririk ez hartzea erabaki du eta maileguen ordainketa gabeziaren epea luzatzea bernegoziaketaren bidez eta ondorioz bere garestitzearekin, baina egunen batean zumaiarrok mailegu horien interesak eta amortizazioak ordaindu beharko ditugu”. “Une honetan udala 4.481.000 eurotako zor bizia jasaten ari da, hau da sarrera arrunten % 37a” azpimarratu du.
Inbertsioei buruz, zinegotzi jeltzaleak proiektuen definizio garbi eta lehentasunen gabezia nabaritu ditu. “Askok ez dute bideragarritasun planik eta proiektuei zuzendutako aurrekontu sailei begiratuz, Bilduk inprobisatu egin duen itxura ematen du, hau da espedientea bete, Zumaiak 2014erako aurrekontuak badituela esateko”
Horrela, frontoiaren edo Beheko plazaren urbanizazioen proiektuen zehaztasun eza aipatu ditu. Baita ere Zumaiako sarrera den Axular-Etxezarreta (N-634) ardatzaren inguruko irtenbide integralari ekiteko aurreikuspen eza. “Hau dugu benetako komunikazio ardatza. Bere garaian Diputazioak 700.000€ bideratu zituen baina inoiz ez ziren erabili honen hobekuntzan”
Era berean informatu du aurrekontuak 2014rako benetako enplegurako udal planik ez duela jasotzen, ez eta Estazio auzoko saneamendu sarearen berritzea edo energia aurrezteko plangintzarik edota ez dagoela partida ekonomiko berezirik etxebizitzak eraberritzeko eta posible izan daiteken etxeetan igogailuak jartzen laguntzeko.
Azkenik, errespetu faltatzat hartu du 2013ko aurrekontuan jasotzen ziren lortutako akordio ia guztiak gauzatu ez izana. “Konpromisoak betetzeko hartzen dira” esanaz amaitu du Edurne Egañak.