Lehenik eta behin, gure elkartasunik beroena adierazi nahi diegu TS Fundicioneseko langileei eta beraien senitartekoei. Sufritzen ari diren egoera honen aurrean babesa eman, eta, orain arte bezala, egingo dituzten mobilizazio guztietan bertan izango garela adierazi nahi diegu.
Egoera tamalgarri hau ez da kasualitate hutsa; langileok sortu ez dugun krisiaren ondorio da hau guztia, kapitalismo neoliberalak sortua. Enpresa honen egoerak badu, ordea, arduradun zuzenik.
Batetik, enpresaren zuzendaritzak eta akzionistek dute egoera honen ardura nagusiena: beraien kudeaketa kaskarrak eta irtenbidea langileekin konpartitu nahi ez izanak ekarri dute une etsigarri hau. Bideragarritasun-planak onura pribatuen mesedetan egin dituzte, eta ez langileen oinarrizko eskubide bermatzeko. Helburua enpresako kide guztien ongizatea balitz, beste egoera batean geundeke, ziur.
Bestetik, Kutxabankek duen ardura ere azpimarratu eta salatu nahi dugu. Herritarron zerbitzura behar lukeen kutxa publiko izatetik pribatizaziora jo izanak duen ondorio garbia da jarrera hau. Guztiona omen den kutxa horrek ezin ditu merkatu interesak lehenetsi ehunka familien behar gorrien aurrean.
ADEGIk, berriz, gure eskualdea laborategi gisa erabiltzea erabaki du: krisiaren aitzakiapean martxan jarri nahi dituen neurri gogorrak eskualdeko lantegietan frogatzeari ekin dio. Neurri hauek gure soldata eta eskubideen murrizketa basatiak ekartzen dituzte, hamarkada ugari atzera egin eta langileon egoera esklabutzara hurbiltzeraino.
Neurri hauek guztiak, TSn hartutakoak barne, Madrilen onartutako lan-erreformaren baimenarekin hartu dira. Lan-erreformak ahalbidetzen du patronalak inpunitate osoz nahi dituen besteko kaleratze eta neurrigabeko soldata jaitsierak eragitea.
Hau horrela, behar-beharrezkoa da lan sindikala. Lan-erreformaren aurrean tinko mantentzeko ezinbestekoak dira enpresa batzordeak eta lan-hitzarmenak defendatzea. Beraz, TS Fundicioneseko enpresa-komitea eta langileak babestu nahi ditugu, langileen eskubideen alde egiten ari diren lana txalotzekoa baita. Orain arteko aldarrikapen sozial eta grebetan jarrera eredugarria erakutsi izan dute beti, eta orain ere duintasun lezio handia ari zaizkigu ematen.
Gure herrietan enplegu duinaren defentsan indarrak batzeko prest gaude. Ez dugu onartuko krisiaren aitzakian hamarkadetan zehar lortutako eskubideak galtzea. Langileok eta herri sektoreak ez gara krisi honen erantzule; eta herritarrei mobilizazioetan parte hartzeko deia luzatzen diegu, gure eskubideen defentsan eta egoera gordin honen erantzuleak interpelatuz. Herri gisa erantzuteko garaia da.
Gora langileen borroka!
Gora euskal langileria!
Zumaiako eta Zestoako Sortu