Urola Kostako Udal Elkarteak eta eskualdeko udalek martxan jarri dute berriro kaleko euskara zerbitzua, gizarteko hainbat esparrutan euskararen erabilera bultzatzeko asmoz. Aurreko aldian bezala, zerbitzuak eskualde osoan egingo du lan, Zumaiatik hasi eta Orioraino; eta, besteak beste, kirolean, merkataritzan eta ostalaritzan eragiteko helburua dauka.
Proiektua garatzeko Udal Elkarteak hiru langile kontratatu ditu, urriaren 15etik 2015ko apirilaren 14ra eta dagoeneko lanean ari dira. Eli Epelde, Irati Agirreazaldegi eta Julio Lopez dira hiru lagun horiek eta udaletako eta Udal Elkarteko euskara zerbitzuen gidaritzapean ari dira lanean.
Bost egitasmo landuko dira:
Eskola kirola
Behaketak egingo dira eskola kiroleko entrenamendu eta partidetan eta neurtu testuinguru horretako hizkuntza portaerak: haurren artekoak, begirale eta haurren artekoak, guraso eta haurren artekoak… Emaitzen arabera, neurriak eta jarduerak bideratuko dira.
Kirol elkarteak
2012ko urtarrilean egin zitzaizkien kirol elkarteei jarraipen bisitak azkenekoz. Hiru urte joan dira eta bisita egin nahi zaie: elkarteen zerrendak eguneratu, elkarte berriei euskara zerbitzua eskaini, beren hizkuntz egoera aztertu, euskara zerbitzuen laguntza eskaini, zer behar duten galdetu…
Merkataritza: ageriko elementuak
2012-13ko lanketaren jarraipena da. Aurreko aldian ageriko elementuak euskaratzeko zerbitzua eskaini zitzaien dendari eta merkatariei. Zerbitzuak oso harrera ona izan zuen, guztira 769 establezimendu bisitatu eta ehundaka txartel eta euskarri egin ziren. Oraingoan ere zerbitzua erabil dezakete eskualdeko establezimendu guztiek, baina bisita egingo zaie establezimendu berriei.
Ostalaritza: menua euskaraz
Menua euskaraz kanpaina orokorra egin nahi da bost herrietan. Helburua da eskualdeko jatetxe guztiek menua euskaraz ere edukitzea. Kanpaina hori urtarriletik apirilera egingo da, Aste Santuko eta udaberriko sasoiari heldu aurretik. Kanpaina horretan parte hartu nahi duten jatetxeek menua euskaraz izan behar dute eta horretarako laguntza emango zaie.
Zerbitzu enpresak: gestoriak
Gestorien eta etxe-komunitateen administratzaileen lanak eragin handia du jende, familia eta enpresa askoren jardunean, bereziki, enpresa txiki eta ertainez osatutako gurearen gisako eskualdeetan. Arlo horri eragiten hasi nahi da.
Datozen asteotan kaleko euskara zerbitzuko hiru lagunak harremanetan jarriko dira eskualdeko kirol elkarteekin, merkatari eta dendariekin… egitasmoak aurkeztu eta zerbitzuak eskaintzeko.