Saretzen proiektua, EITB eta Tokikom elkarlanean

Erredakzioa 2023ko api. 1a, 13:13

Alaitz Artolazabal Tokikomeko zuzendari nagusia, Iban Arantzabal Tokikomeko presidentea, Arantza Ruiz EiTBko albistegietako burua eta Isabel Octavio EiTBko Estrategia eta Komunikazio Korporatiboko zuzendaria.

Elkarlan horren lehen emaitza iazko azaroan argitaratu zen EITBren eta Tokikomen medioetan; tartean, Urolako Komunikazio Taldeko hedabideetan. Hego Euskal Herriko demografia aztertu zuten orduan, eta orain, apirilaren 5ean, bigarren zatia dator: demografia horretan immigrazioak duten tokia, ezaugarriak, eta izan duen bilakaera.

EITBk eta Tokikom tokiko komunikabideen sareak Saretzen proiektua jarri zuten abian iaz, elkarrekin datu kazetaritza jorratu eta datuok modu bateratuan kudeatu eta ustiatzeko. Egitasmoaren helburua da datu kazetaritza elkarrekin eta elkarlanean lantzea, BBCren eta Erresuma Batuko dozenaka tokiko hedabideren Local News Partnership ereduari jarraituz.

Azaroan kaleratu zuten elkarlan honen lehen emaitza EITBren eta Tokikomen medioetan; tartean, Urolako Komunikazio Taldeko hedabideetan. Hego Euskal Herriko demografia aztertu zuten, eta gai zehatz hori landu zuten bai EITBko eta bai Tokikomeko medioek, nork bere esparruari, ezaugarriei eta eremuari egokituta.

Zehazki, 2001-2021 urte bitarteko Hego Euskal Herriko demografia datuak landu zituzten, Eustat eta Nastat iturri hartuta. Azken 20 urteotako populazioaren bilakaera aztertzeaz gain, gizartearen erradiografia egin zuten, biztanle kopuruari, zaharkitzen doan gizarteari eta jaiotza-tasari erreparatuta. Eskualdez eskualde emandako fenomenoetan jarri zuten arreta, eta udalerriak ere aztergai izan zituzten, datuak eskualde, hiri zein herrietako errealitateetatik aztertuta. Hain justu ere, hori izango da Saretzen proiektuaren ezaugarri nagusia: datuak modu bateratuan bildu ondoren, horien lanketa zehatza hedabide bakoitzaren esparrura egokituko da.

Proiektuaren bigarren atala orain iritsiko da, apirilaren 5ean. Demografia azterketa hari tiraka, immigrazioan jarriko da orain arreta, gure artean dauden komunitate nagusiak zenbakietan ezagutzeko batetik, horien bilakaera ikusteko bestetik, eta baita datuen atzean dauden pertsonen istorioak herritarrengana gerturatzeko ere.

Lankidetza-hitzarmena, elkarlan eredua lantzeko

EITBk eta Tokikomek sinatutako lankidetza akordioaren emaitza da Saretzen, eta aliantza horri jarraituz, asmoa da aurrerantzean beste hainbat tematika ere elkarlanean lantzea.

Hain zuzen ere, euskal esparru komunikatiboa garatzea eta trinkotzea da sinatutako hitzarmenaren xedea, biztanleriaren informazio beharrizanak asetzeko eta, bide horretan, tokiko eta nazio esparruko komunikabideen arteko elkarlan eredu bat lantzeko.

Euskaraz sortutako kalitatezko eduki lehiakorrekin Euskal Herriko agendan eragitea ere helburutzat jo du akordioak eta, horri lotuta, eraginkorrak izateko aldaketa teknologikoak eskaintzen dituen aukerak aztertzea eta baliatzea, besteak beste, honako alorretan: formazioa, Internet bidezko telebista, datu kazetaritzaren lanketa eta dataren ustiapen egokia eta bateratua…

Etorkizuneko ikus-entzunezko ereduaren inguruko hausnarketaren erronka ere jasotzen du EITBren eta Tokikom sarearen arteko hitzarmen berriak.

Tokikom euskarazko 76 toki komunikabidek osatutako sarea da. 2012an sortu zen eta ondoko zeregin hauek ditu: toki komunikabideen solaskidetza bateratua beste eragile publiko zein pribatuen aurrean; jarduera esparru komunen kudeaketa: publizitatea, presentzia digitala, kudeaketa, erosketak...; eta sektorearen garapena eta hedapena errazteko konbergentzia estrategiak diseinatzea. Gaur egun, 28 bazkide ditu, orotara 76 komunikabide kudeatzen dituztenak, euskarri guztietan: papera, irratia, telebista eta digitala.

EITB hedabideak dituen ikus-entzunezko talde publikoa da Euskadin. Zerbitzu publiko honen helburua da euskal gizartearen eskaerei erantzutea, informazio, dibulgazio eta entretenimenduko ikus-entzunezko eskaintza anitz, erakargarri eta kalitatezkoarekin, euskal kultura eta hizkuntza sustatuz eta egungo ikus-entzunezko ekosisteman euskara normalizatzen, erabiltzen eta hedatzen lagunduz.

'Local News Partnership' egitasmoa

2021eko azaroan Komunitatea josten jardunaldiak antolatu zituen Tokikomek, Tokikom sari banaketari lotuta, eta hainbat kasu praktiko aurkeztu zituzten bertan, tartean orain oinarri bezala hartutako Local News Partnership proiektua. BBCren eta Erresuma Batuko dozenaka tokiko hedabideren artean osatutako proiektua da Local News Partnership, Matthew Barraclough egitasmoaren zuzendariak jardunaldiotan azaldu zuenez.

Zumaia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide