Ekainaren 14an abiatu zuten eskualdeko itsasontziek hegaluzearen kanpaina, eta orain arte kuotaren %37 arrantzatu dutela azaldu du Orioko Arrantzaleen Kofradiako presidente Jon Mujikak. "Harrapaketari dagokionez, ondo doa kostera, eta etxetik hamabost ordu ingurura arrantzatzen ari dira hegaluzea: Kantauri itsasoan, Bordele (Frantzia) eta Gijon (Espainia) artean, hain zuzen ere".
Harrapaketa "ona" izaten ari bada ere, arrainaren prezioa "jaitsi" egin dela aitortu du Mujikak. Gipuzkoako Kofradien presidente Eugenio Elduaienek pasa den astean azaldu zuenez, "iaz baino %30 merkeago saltzen ari dira hegaluze kiloa". Bat dator Mujika ere: "Aurreko urtean baino ia euro bat gutxiagoan saltzen ari gara. Kontserba industriak dio iazko stocka oraindik biltegietan duela, olioaren prezioaren igoera dela eta, saldu ezinik dabiltzalako". Horrek zuzenean eragiten die eskualdeko arrantzaleei, harrapatzen dutenaren %80 kontserbetarako saltzen dutelako. "Horien menpe gaude. Arrantza ona izan daiteke, baina lehorreko beste hainbat faktorek ere eragin zuzena dute", zehaztu du Mujikak.