Klima aldaketari aurre egiteko bidean, jasangarritasuna sustatzeko eta energia trantsizioan aurrera egiteko informazio gunea zabaldu du Urola Kostako Udal Elkarteak. Zehaztu duenez, eskualdeko eragile ekonomiko guztiei dago zuzenduta, eta xedea da beharrezko informazioa eta baliabideak helaraztea aipatu energia trantsizioan parte hartzeko eta ingurumenarekin gero eta ardura gehiago duen merkatu batean posizionamendu hobea lortzeko. Hala, energia alorreko informazio guneak aholku eta tresna ugari eskainiko dizkie enpresei beren energia kontsumoa murrizten laguntzeko, eta, horrela, eraginkorragoak eta jasangarriagoak izateko.
Horrez gain, UKUEk azaldu du honako helburu hauek lortu nahi dituela energia alorreko gunearekin: eskualdeko egungo energia-egoerari buruzko informazioa zabaltzea; energiaren, mugikortasunaren eta klima-aldaketaren inguruan udal elkarteak egindako ekimenak ezagutzera ematea; energia eraginkortasunaren sustapenean eta klima-aldaketaren aurkako borrokan enpresentzako euskarri izatea, eta, eragileen arteko lankidetza sustatzea klima-aldaketaren aurkako borrokan aliatu izan daitezen.
Bada, hori guztia lortzeko bidean zazpi ataletan banatu du informazio gunea, haiei buruzko informazio zehatza emateko. Hala nola, dirulaguntzak eta betebeharrak, energia motak, prestaketa edota mugikortasun jasangarria.
Informazio gunearekin batera, sentsibilizazio kanpaina ere abituko du UKUEk sare sozialetan. Hala, #energiaplna traola erabilita Facebook, X eta Instagramen egiten dituzten argitalpenei adi egoteko deia egin dute.