Errigoraren udazkeneko kanpainako eskaerak egiteko epea bukatzear da; hain justu, osteguna, azaroak 14, izango da horretarako azken eguna. Errigora.eus webgunearen bidez egin behar dira eskaerak, ondoren norbere herrian izendatutako tokietan jasotzeko. Nafarroako produktuz osatutako hiru saski daude aukeran, eta honakoak dira:
- Saski beltza (55 euro): piperrak, zainzuriak, orburuak, kardua, potxak, borraja, tomate naturala, teilak, mahats zukua, ardo beltza, ilarrak eta patxaran mantekatuak.
- Saski berdea (65 euro): piperrak, zainzuriak orburuak, txitxirioak, pasta, dilista lehorrak, ardo ozpina, tomate frijitua, sagar zukua, konbutxa tea, txokopipitak, eko teilak eta haritz ardo beltza.
- Saski gorria (75 euro): Rose ardo apartsua, kriantza ardo beltza, ardo zuria, patxarana, mantekadak, polboroiak, txokolatezko molineritoak, zainzuriak, turroia, piperrak eta ardi gazta.
Aurten, gainera, beste produktu bat ere kaleratu du Errigorak: Agertuz karta jokoa. Saskiekin batera eska daiteke karta sorta, bost euro gehiago ordainduta, baina jokoa bakarrik eskatzeko aukerarik ez dago.
Agerreko uzta euskarari puzka da aurtengo udazkeneko kanpainaren leloa, eta hain zuzen ere, Nafarroako Ager eremuan euskara loratzeko egitasmoetara bideratuko dute bildutako dirue.
Jaso, azaroaren 28tik aurrera
Eskaerak egiteko epea ez ezik, horiek jasotzekoak ere dagoeneko zehaztuta dituzte kanpainaren antolatzaileek, eta honako hauek dira:
- Azkoitian. Kultur Etxeko hirugarren solairuko areto nagusian; azaroaren 28an, 18:00etatik 20:00etara, eta 29an, 11:00etatik 13:00etara.
- Azpeitian. Abenduaren 2tik aurrera, Elikagunean eta Azpeitiko Ikasberri ikastolan, beren ohiko ordutegian.
- Getarian. Eskualtxeta eraikinean, azaroaren 28an, 16:00etatik 20:00etara.
- Orion. Orioko Herri Ikastolan, azaroaren 29ko arratsaldetik aurrera, ikastetxeko ordutegian.
- Zarautzen. Azaroaren 28an, 17:00etatik 20:00etara, eta azaroaren 29an, 12:00etatik 14:00etara. Lekua zehaztu gabe dute.
- Zestoan. Zestoako AEK euskaltegian, azaroaren 28an, 16:00etatik 19:00etara, eta 29an, 09:30etik 12:30era.
- Zumaian. Kofradia azpian (Justa taberna izandako lokalean), azaroaren 29an, 18:30etik 20:00etara, eta azaroaren 30ean, 11:30etik 13:30era.
*Inork bertaratu ezingo balu, eskertuko lukete abisatzea.