Manuel Gorostiaga Isasti zendu da, hogei urtez Getariako Elkanoren Lehorreratzean Joan Sebastian Elkanoren papera zuena. Zumaiako bizilagun getariarrari familiatik etorri zitzaion mundubira eman zuen itsasgizona interpretatzeko lekukoa. Aurrena, tripulante bezala aritu zen, eta gero, Elkano izatera pasa zen. Hori bai, GUKAri eskainiko elkarrizketetako batean argi adierazi zuen beti saiatu zela "ahalik eta ondoen egiten".
Gorostiagak ondorengoa ekarri zuen gogora aldi hartan: "Nik ume-umetatik ezagutzen dut hau, jaio nintzenetik. Aitonak egiten zuen aurrena Elkanorena. 1922an egin zen lehendabiziko aldiz, eta aitona zenak irten zuen orduan Elkanoren paperean. Urte mordoxka batean egin zuen, garai hartan urtero egiten baitzen lehorreratzea. Gero, Miguel Isastik egin zuen haren segidan, eta nik bosgarren aldia edo dut aurtengoa [2014]".
Horrez gain, Getariako Arraun Elkartearen sortzailea, arraunlaria eta presidentea ere izan zen, eta klubak oharra atera du bere Instagram kontuan, baita haren argazkiekin eginiko bilduma bat ere. "Manuel Inaziori esker, besteak beste, Getariako hainbat belaunaldik arrauna bizi ahal izan dugu. Mila esker eman diguken guztiagatik!".
Gorostiaga atzo hil zen, 78 urte zituela, eta haren hileta elizkizuna ostegun arratsaldean izango da, 18:30ean, Getariako Salbatore Deunaren parrokian. Hilbeila Zumaiako Albia beilatokian izango da gaur, 10:30etik 16:30era; ondoren, 17:00etan, Getariako hilerrian lurperatuko dute.