Pasa den uztailaren amaieran hasi zituzten Arroagoia eta Narrondo arteko bidegorriaren zatia eraikitzeko lanak. Behin lan horiek amaituta, Arroagoia eta Iraeta arteko tartea egitea faltako da Zumarraga eta Zumaia arteko bide berdea amaitzeko. Uztailaren 30ean Arroabeko Sansinenea industriagunean egindako agerraldian iragarri zutenez, azken zati hori urte amaieran edo datorren urte hasieran lizitatuko dute.
Udatik hona, Urolako trenaren errailak kokatzen ziren plataforma gainean egin dituzte lanak. Arroabeko tren geltoki zaharretik malda baten bitartez jaitsiko da bidegorria, trenzubi inguruan, errepide parera heltzeko, eta handik Zumaia eta Narrondo arteko bidegorriarekin bat egiteko. Justu, datozen astetan aurre lanak egingo ditu Gipuzkoako Foru Aldundiak Narrondo inguruan.
Lan horiek N-634 errepideko errei bat itxi beharra ekarriko dute, eta denbora horretan trafikoa txandakakoa izango da. Aurreikuspenen arabera, hiru aste iraungo dute aipatu lanek.