Urola Kostako Udal Elkarteak robotika eta programazioa ulertzeko eta praktikan jartzeko bi tailer antolatu ditu LH2 eta DBH1 arteko haur eta gazteentzat. Apirilaren 7tik 10era bitarte izango dira saioak, Udal Elkartearen egoitza nagusian, 9:30etik 13:30era.
OpenLab ekimenaren baitan antolatutako saio hauetan, robotika erabilita erreskate sistema bat martxan jartzen ikasiko dute haur eta gazteek. Zehazki, larrialdi dei bat jaso ostean zauritutako bi lagun erreskatatu beharko dituzte mendikate baten tontorrik altuenetik. Basque Robot League txapelketarako Doplay-k garatu du erronka hau.
Bestalde, 2D plataformako bideojoko bat sortuko dute. Horretarako, Python programazioaren oinarrizko kontzeptuak ikasiko dituzte. Jokalariek oztopoak gainditu, asmakizunak ebatzi eta itemak biltzeko gai den pertsonaia bat kontrolatuko dute.
Izen-ematea
Interesdunek martxoaren 26ra arte izango dute Urola Kostako Udal Elkarteak antolatutako saioetan izena emateko aukera. Horretarako, esteka honetan azaltzen den galdetegia bete beharko dute.