Urola Kostako Udal Elkarteak (UKUE), Gipuzkoako Foru Aldundiaren Eskualdeak 2025 hitzarmenaren barruan, Lanaren Zentzua programa jarri du martxan aurten ere. UKUEren hitzetan, aurreko edizioetan parte hartu zuten enpresek emaitza "oso positiboak" lortu zituzten.
Ekimenaren helburua da langileentzako zentzuzko lan testuinguruak sortzea, beraien motibazioa, produktibitatea eta errendimendua hobetzeko. Horretarako, enpresaren barne-antolamendua eraldatzea proposatzen dute: langileen konpromisoa indartzeko, talentu kualifikatua erakartzeko eta berrikuntza sustatzeko.
Horretarako, enpresek, programa gidatuko duten adituekin batera, diagnostikoa egingo dute lehendabizi, eta ondoren hausnarketa prozesua garatuko dute. Azkenik, ekintza plana osatuko dute. Proiektua moldagarria da, eta diagnostikoa egin ondoren enpresak berak erabakiko du hurrengo faseekin aurrera egin ala ez.
Programan parte hartzea doakoa da Urola Kostako enpresentzat, UKUEren eta Gipuzkoako Foru Aldundiaren finantzaketari esker.