Antxoa Eguna estropadaren zortzigarren edizioa jokatu zuten larunbatean Getarian. Getariako Arrantzaleen Kofradiak antolatzen du bela estropada, Zumaiako Nautika Elkartearen laguntzarekin. Maniobra ausartak, abiadura eta erabaki azkarrak izan ziren Andarax belaontziaren garaipenarekin amaitu zen estropadaren osagaiak.
Antolatzaileen arabera, tentsio handiko estropada izan zen hasieratik. "Hego haizeak tripulazioak bolada bakoitzean gogor lan egitera behartu zituen irteeran, buiatik gertu irtetea baitzen helburua, ahal beste metro irabazteko", azaldu zuten. Hala, hasi orduko, bi estrategia argitan banatu zen flota: "Itsasontzi batzuek kanpoalderantz haize garbia bilatzen zuten bitartean, ausartenak kostaldetik gertuko haize-aldaketei etekina ateratzen saiatu ziren, lehen baliza igarotzean lider izateko estra horren bila".
Flotaren buruan, erritmo bizia ezarri zuten Andarax eta Xibika belaontziek, atzekoei akatsik egiteko tarterik utzi gabe. "Andarax-ek abiadura goren bekaizgarria erakutsi zuen, nabigazio-lerro oso oldarkorra mantenduz eta haizera igotzeko tarteetan metro erabakigarriak irabaziz. Bestalde, Mastabakarra edo Zirka bezalako tripulazio eskarmentudunek beren kartak ezin hobeto jokatu zituzten, haize-aldaketak kudeatuz eta beren posizioa defendatuz, alturako belaren hitzordu handiak gogorarazi zituen banan-banako markaketa batean", azaldu zuten antolatzaileek.
Lehenengo buiak igarota, Zumaiako Andarax-ek distantzia ona irabazi zuen, eta hori mantentzea besterik ez zitzaion gelditzen. Hala ere, lehenengo itzuliko lehen buia igarotzean, haizea baretu egin zen, eta buruan zen taldearen abiadura moteldu zen. "Flota akordeoi baten gisa elkartu zen. Arratoia lekuko mutu zela, haizea berriro harrotzen hasi zen eta itsasontziak berriro banan-banan martxan jarri ziren bigarren itzuliari ekinez. Estrategiak aldatu ziren, baina emaitza berdinarekin atera ziren", azaldu zuten arduradunek.
Horrela, borrokatutako garaipena lortu zuen Andarax belaontziak, estropadaren ez ezik, Neguko Ligan ere bai. Getarian jaso zuten saria ligako lehen hiru sailkatuek, Andarax-ek, Xibika-k eta Maixu-k, hurrenez hurren. Orain, Olarru Cup liga berriari begira daude belaontziak.