Aitortza batekin hasiko naiz: badakit diruak ez daukala aberririk, baina beste banku edo aurrezki-kutxa batzuekin alderatuta, oso urruti geratzen zait Banco Santander; ez ditut bertako langileak ezagutzen, ez naiz inoiz sartu sukurtsal barrura, baina sartzeko gogo handirik ere ez daukat, eskaparatean jarri berri duten propaganda ikusita. Itxura batera, zumaiarrok hain gorrizaleak izanda, esango nuke asmatu dutela irudi korporatiboarekin, ez balitz oraingoan ere gaztelania hutsean jarri dutelako iragarkia.
10.000 milioi euroko dirutza gure enpresak bultzatzeko, baina euro ziztrinik ez iragarkia euskaraz jartzeko?
Hainbesteko ahaleginak euskararen alde, hainbeste “Euskaraz bizi nahi dut!”, hainbeste EBPN, korrika eta saltaka, Euskaratxanpan, Uema…, eta gutxien espero dugunean (edo ez?), aiba!, Zumaiako Erribera kale erdian, lotsa izpirik gabe, gaztelania hutsean!
Aterako al diogu txartel gorria Banco Santanderri?
