2014ko hasieran izandako denboraleen ondorioz txikizio handiak izan ziren euskal kostaldean. Zumaiari dagokionez, lehen txanda hartan, Itzurun hondartzako pretila eta barra konpontzea adostu zuten Itsasertzaren Zuzendaritza Nagusiak eta Zumaiako Udalak. Denboraleak, baina, Inpernupen ere eragina izan zuen. Itsasoak lur dezente eraman zuen eta zabaldegi azpian dagoen materiala agerian geratu zen: Inpernupen garai batean zegoen zabortegira botatzen ziren plastikozko poltsak, beirazko botilak, plastikoak, etab. Zabor horren gainean betelanak egin ziren eta gaur arte ezagutu izan dugun zabaldegi txikia sortu zen.
Aste honetan hasi diren lanen bitartez, hondakinak kalatik eramango dira eta ingurune guztia txukunduko da. Oraindik erabaki gabe dago horma txiki bat eraikiko den edo ez.
Iaz izandako denboraleei aurre egiteko Espainiako Gobernuak sortutako diru-laguntzen bitartez egingo dira lan hauek. Aurrekontua 114.389,12 eurokoa da eta lanak burutzeko epea aste batekoa izango da; Hiru astekoa azkenean horma egiten bada.