Ostiralean gaueko 11tan atera ziren korrikalariak Beasaindik. 88 kilometroko luzera eta 6.000 metroko desnibel positiboa duen lasterketa bete behar izan zuten. Beasaingo Udaletxeko plazatik aterata, Zaldibia, Larraitz, Txindoki lepoa, Uarrain, Lizarrusti, Etxegarate, San Adrian, Oazurtza eta Mutiloa zeharkatu behar zituzten berriro Beasainera heldu arte.
Azkarrenek bidea 11 ordu inguruan betetzea aurreikusten zuten antolatzaileek eta korrikalariak uste baino dezente azkarrago ibili ziren. Iokin Garai oñatiarrak irabazi zuen proba 10:13:50 denborarekin. Bigarren Berastegiko Ion Azpiroz sailkatu zen, 10:18:19 denborarekin, eta hirugarren Pedro Etxeberria zumaiarra, 10:35:04 denborarekin.
Beste hiru zumaiarrek ere lortu zuten proba amaitzea: Jose Antonio Alberdi 286. izan zen 19:09:19 denborarekin, Iñaki Arriola 294. 19:30:06 denborarekin eta Agustin Zumeaga 295. 19:30:11 denborarekin.
Elizalde anaiek, Ehun Miliak
Bestalde, Ismael eta Xabier Elizalde anaiek Ehun Miliak proba amaitzea lortu zuten. Ismaelek 41 ordu 53 minutu eta 41 segundo behar izan zituen 168 kilometroak osatzeko, eta anaia Xabier jarraian sartu zen helmugan, hiru segundo geroago. Sekulakoa bi kirolari hauen ahalegina. Zorionak hauei ere.