Hilabete bukaeran amaituko da Julene Azpeitia literatur lehiaketara lanak aurkezteko epea. Zumaiako Udaletik literatur sorkuntza bultzatzeko asmoarekin jaiotako ekimen honek dagoeneko 28. edizioa izango du aurtengoa.
Lehiaketa honetara aurkeztutako idazlanek baldintza hauek bete beharko dituzte:
- Euskaraz idatzita egon, originala izan eta argitaratu gabea.
- Gaia librea izango da, eta ipuinak gutxienez 6 orrialde eduki beharko ditu eta gehienez 15, lerroarte bikoitzarekin idatziak, orriaren alde batetik. Lan bakoitzaren lau ale bidaliko dira.
- Idazlanak, onartua izateko, izenburua bakarrik eramango du agerian eta idazlearen izena ezin izango da inon aipatu. Idazlanarekin batera, gutun-azal itxi bat bidali beharko da, kanpoaldean idazlanaren izenburua jarrita, eta barrualdean, berriz, egilearen izen-abizenak, telefonoa, helbide elektronikoa, sinadura eta NAN agiriaren fotokopia.
- Aukeran izango da lanak posta elektronikoz bidaltzea ere; euskara@zumaia.eus helbidera. Kasu horretan norberaren datuak lanarekin batera bidaliko dira eta epaimahaiko idazkariak izango du lan irabazleak ebatzi arte datuok gordetzeko ardura.
- Zumaiako Udalak izendatutako epaimahaiak ebatziko du lehiaketa. Epaimahaiko idazkaria Zumaiako Udaleko euskara teknikaria izango da, eta ez du botorik edukiko.
- Sariak eman gabe utzi ahal izango dira, eta finkatutako diru kopuruak zatiezinak izango dira.
- Zumaiako Udalak beretzat gordetzen du saritutako obrak argitaratzeko eskubidea, baina argitaratzekotan, epaimahaiak ebazpena eman eta urtebeteko epearen barruan argitaratu behar du, bai bere kabuz, bai beste batzuen bidez. Lehenengo argitalpenaren ustiapen eskubideak Zumaiako Udalarenak izango dira.
- Epaimahaiaren ebazpena itzulezina izango da, eta lehiaketa honetan parte hartzeak oinarri hauek onartzen direla esan nahi du.
- Idazle bakoitzak ezin izango du sari bat baino gehiago jaso.
- Sariak: 3 sari emango dira. Lehen saria: 3.000 €. Bigarren saria: 1.500 €. Zumaiako onenaren saria: 1.000 €
Idazlanak helbide honetara bidali beharko dira:
Zumaiako Udala. Euskara Zerbitzua. Foruen Enparantza, 1. 20750 Zumaia. Julene Azpeitia 28. ipuin lehiaketarako dela adierazita.