Eraikinari bigarren solairu bat ateratzeko proposamena egin zuen eskolak, baina azkenean bakarra izango du. "Eraikina pixka bat altxatzea nahikoa da bigarren solairua egin ahal izateko, eta horrela espazio asko irabaziko genuke; baina ez dute onartu", diote penaz Amondarainek eta Azpirozek. Institutuaren ate nagusiaren parean izango du sarrera eraikin berrituak, eta bien arteko pasabidea estali egingo dute. Ikasgelentzat leihoak irekiko dituzte eraikinaren zabalera osoan, eta kanpoaldetik koloretako xaflekin (berdea, laranja eta grisa) apainduko dute eraikina.