Estropada zoragarria egin du gaur arratsaldean Telmo Deunen bigarren traineruak KAE2ko estropadan. Bigarren txandan atera dira zumaiarrak, Donostiarra, Camargo eta Bermeo-Mundakarekin. Bosgarren eta zortzigarren postuaren artean sailkatu dira normalean aurten baina gaur, etxean, beraien onena atera eta, txanda irabazteaz gain, bigarren bukatu dute azken sailkapenean, Oiartzunen atzetik. Txanda ederra izan da gainera, lau traineruak pare-parean ibili baitira hirugarren luzera arte. Hirugarren ziabogara lau segundoko aldearekin iritsi da Zumaia Donostiarrarekiko, eta aldeari eusteko gai izan da azken luzean.
San Miguel Ligari dagokionez, Portugalete atzean uzteko gai izan da Telmo Deun, eta beste puntu bat jan dio bi traineruek jaitsierari ihes egiteko daukaten buruz-buruko lehian. Tartean beste traineru bat sartzeko zorian izan da, gainera, baina Cabok azkenean Zumaiak baino segundo erdi eskas azkarrago amaitu du. Pena, puntu guztiek urrezko balioa baitute hemendik aurrera. Dena den, zumaiarrak ari dira pixkanaka aldea jaten, eta bihar beste urrats bat egiteko aukera izango dute etxean, zumaiarren bultzadarekin.
