Lasterketari ekin aurretik urteko kirolari onenen saria jaso dute Iñigo Peñak eta Pulpo eskubaloi taldeko neskek. Peñak berak eman dio irteera lasterketari. 300 korrikalari abiatu dira Erribera kaletik, saltaka egiteko eguraldi aproposarekin. Parolaldera joan eta berriro Erribera kaletik pasa direnerako –bigarren kilometroa– lasterketa buruan zen David Garcia, tartea irekita. Eta halaxe osatu du ibilbide osoa. Atzean, Unai Arroyok ondo eutsi dio bigarren postuari, eta hirugarren iazko irabazle Xabat Manzisidor izan da, atzetik aurrera egindako lasterketan.
Emakumeen artean Gema Hernandezek ez du aurkaririk izan. Hasieratik alde handia atera du eta arazorik gabe lortu du garaipena. Leire Lizarralde eta Oihana Ortiz sartu dira ondoren, biak eskutik helduta.
Zumaiarren artean, bi beterano izan dira azkarrenak: Jonan Rodriguez eta Sonia Albarez. Rodriguezen atzetik, Iban Iriondo eta Jokin Gijarro iritsi dira. Eta emakumeen artean, Josune Cintero eta Vanessa Galarraga izan dira bigarren eta hirugarren azkarrenak.
