Usoa Fullaondo (Algorta, 1979) Euskal Herriko Unibertsitareko Arte Ederretako Fakultateko Pintura Saileko doktorea da eta baita sail horretako alboko irakaslea ere. Arteko graduan eta Arteko ikerketa eta sorkuntza Masterreko klaseak ematen ditu. 2007tik Fakultateko Enbidia ikerketa taldeko kidea da.
Artista berak honako hitzekin definitu da bihar zabalduko den erakusketa:
"Chandal erakusketa 2012ko udatik burututako lan prozesuaren ondorio eta isla da. Objektu-afekzioetatik eratutako eta hutsalkerien atlasetik sortutako marrazki, objektu, koadro eta instalazioak aurretiaz zehaztugabeko eran eraikitzeko moduak bideratzen ditu. Era errepikakorrean aurkitutako materialak eta bizitako esperientzi atalak, egunerokotasunaren testuinguruan bereizi egiten direnak, gosaltzeko eta nor bere baitan biltzeko ekintzan, astean hiru edo lautan korrika egiterakoan edo izerditzerakoan. Korrika aritu zein estudioko mahaian, paretetan edo zorutik lanean aritzea eta zerbait gertatzea goma-apar zati apurtu bat, limoi bat, lorea edo egur puska bat eta gure artean. Egiten ekitea eragin eta bideratzen duten izate sentikorrak, ekintza berria pizten dutenak. Gauza arroztuak eta zenbait esangura sakonen artean egituratzen diren konstelazioak konfiguratzeko eguneroko tentsioek eragiten duten bizi-suspentsioa."
