.jpg)
Su-hiltzaileen sirena hotsak bat baino gehiago larritu du, are gehiago taberna batek su hartu duela zabaldu denean. Hamarrak aldera, Labarra tabernako frijigailu batek su hartu du eta, hasiera batean, larritu egin dira bertan zeudenak sua itzaltzeko gai ez zirelako. "Zeuden bezero apurrei alde egiteko eskatu diet. Azkenean estintorearekin neuk itzali dut. Su-hiltzaileak etorri direnerako itzalita zegoen", esplikatu digu Peio Francok.
Sukaldean estintoreko hautsa dago zabalduta eta erredura orban txiki bat frijigailuaren pareko horman, baina kalte larririk ez. "Orain egun batzuk itxita eduki beharko dugu, hau garbitzera etorri beharko dute eta; baina eguraldi txarra dator eta atseden hartzeko ere ez zaigu gaizki etorriko; hemen urte batzutara kontatzeko zeozer badaukagu", esan du, larrialdia pasata, umoretsu.