"Aste Santuaren atarian musika sakroa ardatz izango duen kontzertu bat antolatu dugu. Musika ordea ez da Aste Santuko musikara mugatuko, garai eta jatorri ezberdinetako musikak uztartuko dira: Errusiatik Euskal Herrira eta Alemaniatik Italiara. Zenbait obra elizkizunetan abesteko idatziak izan ziren, beste batzuk, ordea, kontzertuetan eskaintzeko. Gaur egungo musika nagusi izango den arren, egile gehienak bizirik daude, errenazimendu garaiko, barroko garaiko eta garai erromantikoko adibideak ere entzungai izango ditugu", azaldu du San Pedro Abesbatzako kide Iker Gonzalez Cobeagak. "Xatz Eskifaia emakumeez osatutako korua izanik formato ezberdinak entzungo ditugu, ahots grabeak, ahots txuriak eta ahots nahasiak", gaineratu du.
Egitaraua Komentuak eskaintzen dituen ezaugarrietara egokitu da. Horien artean bi estreinaldi izango dira: koruko kide den Iker Gonzalez Cobeagak koru bikoitzara idatzitako O Magnum Mysterium eta ahots grabeentzat pianoaren laguntzaz idatzitako Ubi Caritas.