Abenduaren 13an Gipuzkoa Kirolak Sarien banaketa ospatuko da. Hori dela eta, lurraldeko kirol federazioek, Gipuzkoako Foru Aldundiko Kirol Zerbitzuarekin lankidetzan, hainbat hautagai proposatu dituzte deitutako bi sarietarako: Gipuzkoa Kirolak saria eta Gipuzkoarren Kirola saria. Hautagaien artean hiru zumaiar daude: Helene Alberdi triatleta, Kauldi Odriozola eskubaloi jokalaria eta Iñigo Peña piraguista.
Gipuzkoa Kirolak sariaren kasuan kirol merezimenduengatik Gipuzkoan gehien nabarmendu den pertsona sarituko da. Epaimahai tekniko batek erabakiko du zein kirolariri edo kirol talderi eman saria. Gipuzkoarren Kirola saria, berriz, sari herrikoi bat izango da. Bi sarituek, hurrenez hurren, 2.000 eta 1.000 euroko diru-kopurua ere eramango dute.
Herritarrek Gipuzkoarren Kirola sarirako botoak eman ditzakete web orri honen bidez. Pertsona bakoitzak boto bakarra eman dezake, eta, horregatik, posta elektronikoaren eta mugikorraren datuak eman behar dira. Epea abenduaren 03an amaitzen da.