Zumaiako Zesta Punta Eskolako ikasleek jokatutako partidaren ondoren, jaialdiko estelarraren txanda izan zen. Iñaki Osa Goikoetxea eta Gotzon Enbil zumaiarrak batetik, eta Mikel Egiguren eta Eric Irastorza bestetik. Lau jokalariak ere maila gorenekoak. Lehen setean 15-11 emaitzarekin irabazi zuten zumaiarrek. Bigarrena, berriz, Egigurenek eta Irastorzak irabazi zuten, 10-15 emaitzarekin. Berdinketa hausteko set laburrean Goikoetxeak eta Enbilek irabazi zuten, 5-4 emaitzarekin.
Bi partiden artean Darahlik egiten duen lanaren berri eman zuten kantxara atera ziren zenbait gazte. Frontoiko korredoreetan elkartearen jardueraren inguruko zenbait panel ere jarri ziren.
Zesta punta utzi duten lau zumaiar ere omendu zituzten atzokoan: Beñat Floresek, Unai Zinkunegik, Luis Osak eta Gotzon Enbilek jarduera profesionala amaitu dute eta garaikur bana eman nahi zieten. Luis Osaren garaikurra Iñaki anaiak jaso zuen eta Beñatena Manuel Mugerzak.
Lau txapeldun handiek erabilitako kamisetak zozkatu ziren jaialdiaren amaieran. Irastorzak, Enbilek eta Egigurenek jantzitakoak badituzte jabeak; Goikoetxearena ematea falta da. 0929 (gorria) zenbakiari dagokio. Otsailaren 4a baino lehen aurkeztu beharko du txartela, bestela saria ordezkoarentzat izango da: 2996 (gorria).
Argazkiak Peio Romatetenak dira.