Gipuzkoako Foru Aldundiak aurrekontu irekien ekimenarekin bi urte daramatza. Iaz lurraldeko 38 udalerritan jarri zuten karpa herritarren ekarpenak, proposamenak eta iradokizunak jasotzeko. "Gipuzkoarrek 4.448 ekarpen egin zuten, eta horietatik %61 aurtengo aurrekontuetan hartu dira kontuan", kontatu du karpako langile batek.
Aurten, Gipuzkoako udalerri guztietan izan dira. Zumaian, gaur egongo dira Eusebio Gurrutxaga plazan 2019ko aurrekontuetarako herritarren proposamenak, ideiak, ekarpenak eta iradokizunak biltzen 19:00ak arte. Bertara joan ezin dutenek baina beraien ekarpena egin nahi dutenek gipuzkoa.eus/partaidetza webean dute aukera.