Hasteko, gaur, 17:45ean hasita, esku pilota txapelketa herrikoiaren azken partidak jokatuko dira Odieta pilotalekuan. Hasteko, 3. eta 4. postuak erabakitzeko partida jokatuko dute Aizpurua-Astigarraga eta Oiartzabal-Mendizabal bikoteek. Jarraian, finala jokatuko dute Antia-Agirre eta Odriozola-Alkorta bikoteek.
19:30ean hasita, eskuz binakako profesional mailako jaialdia jokatuko da Aitzuri frontoian. Lehen partidan Peña II-Urretabizkaia II, Bakaikoa-Arangurenen aurka arituko dira, eta estelarrean, Olaizola II-Larunbe, Bengoetxea VI-Albisuren aurka. Sarrerak 25 euroan izango dira salgai Aitzuriko leihatilan.
Bihar arratsaldean, berriz, pala txapelketa herrikoiko finala jokatuko da Odieta pilotalekuan. 18:15ean 3. eta 4. postuak erabakitzeko partida jokatuko dute Mikel Martinezek eta Imanol Zuazobidek. Finala 19:00ak aldera jokatuko dute Arkaitz Lozanok eta Jon Zubimendik.