Atzo, San Bartolome Egunez, ohiko meza nagusia izan zen Oikian. Jarraian, pilota partidak jokatu zituzten frontoian: Zubiria - Bikuña bikotea gailendu zen Alberdi - Aizpururen aurkako norgehiagokan, markagailua 22 eta 21 utziz. Larrañaga - Etxabe bikoteak, aldiz, 22 eta 17 irabazi zuen Gurrutxaga - Beristainen aurka.
Arratsaldean asto probek hartu zuten plaza, eta ikusle ugari bertaratu zen saioa jai giroan ikustera. Valentin Eizagirreren astoa nagusitu zen; Peio Etxaberen, Ander Etxaberen eta Iñaki Muniosororen astoen aurkako proban.
San Bartolome jaietako Euskal Jaia ospatuko dute gaur. Egun osoan zehar, ohiturari jarraiki, baserriz baserri eta etxez etxe dantzan ibiliko dira bertako gazteak. Arratsaldean, aldiz, bertako baserrietako sagardo dastatzea izango da plazan.
